Schirmi 2025 – seit Danke und Tschüss

Am 18.01.2025 um 15.00 Uhr im Embrisaal hani mir denkt: Guet, machsch halt mal chli Schirmherr. De Uftritt perfekt plant – mini Nerve komplett im Eimer. Wo ich uf de Vorplatz gfahre worde bin, hani innerlich scho d’Flucht planet gha. Z’spat – Inthronisation und Zack, scho bin ich Schirmherr.

Ab däm Moment isch für mich klar gsi: Jetzt chunnts Chaos mit Titel.

Zum Glück hani en Zeremonienmeister gha – Dani Leutwiler:
– Er het gwüsst, was lauft, ich nöd
– Er het informiert, ich vergässe
– Er hät plant und ich paar Glesli gno
Dani, mal ehrlich: Ohni dich wär das Jahr komplett chaotisch gsi.

De Start in Dietikon bi Bilderbuechwetter – das hät ois natürli grad ufwind gäh.

Denn isch’s gange wie de Blitz:
Thun, Reinbischofsheim (DE), Berikon, Reichenburg, Kehl (DE), Dottikon, Wohlen, Hägglingen und so wieter – vo Ort zu Ort, vo Beiz zu Beiz, vo „nur eis Glesli“ zu „wer isch das überhaupt ?“
– Es Glesli deht, es Glesli da – plötzlich hät jede Umzug 48 Stunde gha.

Urdorf – natürli Fasnacht pur. Riesige Umzug, Mänsche ohne Endi, Stimmung wie im Hexechessel. Und dänn d’Uslumpete mit em Konfetibegräbnis – emotional, würdevoll und de Leutwiler liet flach. Ich hoffe in dem Jahr, chasch au du würdig abschied näh und die Gschicht «Rocke».

Wohlen… ja Wohlen. Bi de Gschenkübergab het sich en Fläsche Wii denkt: „Ich gang jetzt selber is Gschichtsbuech i.“
Abflug – Vollgas – Bodekontakt und de Saal explodiert vor Lache. Ich: Verschrocke ! Chönd’s dänn die cheibe Fläsche nöd fange. Euse Dani – en Gesichtsausdruck wie binere Steuerprüefig. Das sind Gschichte wo d’Fasnacht schribe tuet.

Und jetzt die wahri Hauptattraktion – CLIQUE SCHÄFLIBACH DE FASNACHTSVEREIN

Jetzt emal ganz ehrlich:
Dank eu hani es Jahr dörfe erläbe wo eifach grandios gsie isch.

Ihr sind nöd nur begleitend gsi – ihr sind für mich hypnotisierend gsi:
Eifach – luut – frech – unüberhörbar. Wo ihr gsi sind, hät mer nüt meh ghört – ussert eu. Wo ihr gsi und ufträte sind, isch kei Widerstand meh möglich gsi. Clique Schäflibach Urdorf = Fasnacht ufem Maximum.

Ihr hend mi begleitet, gstützt, gschützt und regelmässig komplett verführt. «Und ja: Es isch kei einzigi Minute ruhig gsi – aber jede Sekunde geil».

Am Schluss bliibt nume eis z’säge:
Danke an alli, wo mitgmacht, mitglacht, mittrunke, mitgholfe und mängisch au mitglitte hend. Das Jahr isch gsi wie ich – nöd perfekt, aber legendär.

Eue Schirmi 2025 verabschiedet sich mit Ehre und Ehrfurcht und im Herze voll Fasnacht sowie mim feste Vorsatz für Zuekunft:

👉 «Nie meh en Fläsche Wii in de Hand ha, wenn de Dani in Sichtwiiti isch» 🍷😉

Eue Schirmi 2025: Dominic «de Zuckerbeck» Stutz