Schirmi 2024 seit «Tschüss und Danke»

Vor genau eim Jahr um die gliichi Ziit,
nervös bini gsii und ha gwüsst, bald isch es sowiit.

Ich dörf ez dänn es Jahr als Schirmherr walte,
und cha vorher es paar vo eu nochli zum Narre halte.

De Tag isch genau so chalt gsii wie de Tag hüt,
in beschter Erinnerig aber bliibed mir all die tolle Lüüt.

En schönere Start hettis für mich nöd chöne sii,
und dänn ischs los gange, in Rheinbischofsheim simmer gsii.

Narii, Naroo, Holdrio. Chli Asbach hemer auna gsoffe
und sind würkli uralt heiwerts gloffe.

Det hani de Chopf denn schona chli gmerkt am Morge,
aber spöter am Umzug in Dietike verflüged alli Sorge.

Au in Chur, Rapperswil und Sarmenstorf hemmer na es Bsüechli gmacht,
hend tagelang gfäschtet, gfiired und de Ranze vollglacht.

Uf Brunne, Wohle und Hägglige simmer zum Biispiel au,
riesigi Gugge und kreativi Wäge häts gha, eifach nume Wau.

A ganz vill schöni Umzüg und Ahläss hemmer dörfe gah,
und händ stehts für d’Gaschtgeber es Gschänk debii gha.

Sovill gueti Bekanntschafte hani gmacht uf dere Reis,
au weni nüme vo jedem de Name weis.

Denn sind all a euses Narrefäscht in Urdorf cho,
an Nachtumzug, a d’Chinderfasnacht, is Narredörfli und so.

Bi dem Highlight hend alli eusem Motto na,
d Funke so richtig sprühe lah.

Mit de Uslumpete bi strahlendem Sunneschii,
isch d’Fasnacht für mich als Schirmi den fertig gsii.

Sanft hani s Konfetti id Erde gleert
und bildhauermässig miteme Stei beschwert.

Am neue Schirmherr wünsch ich genauso e tolli Ziit,
glii gsehnder wers isch, bald isches sowiit.

Ich möcht de Clique no herzlich DANKE säge,
das ich das alles ha dörfe erläbe.

Au es Merci minere Frau und eusem Chind,
schön das ihr so oft mitcho sind.

Eu allne zäme wo mich als Schirmi begleitet hend,
sägi DANKE für die viele guete Erlebnis und Moment.

Und immer weni dihei no es Konfetti find,
denki a eu… und daser alles geili Sieche sind.

Schirmi 2024 / Stefan «de Steichlopfer» Isenschmid